Қазақстан аумағына гипсокартон әкелуге уақытша тыйым салынды, деп хабарлайды +7.kz.
Сауда және интеграция министрі тиісті бұйрыққа қол қойды.
Құжатқа сәйкес, Қазақстан аумағына гипстен жасалған плиталар, табақтар, панельдер және ұқсас өнімдерді (ЕАЭО ТН ВЭД коды 6809110000), тек қағазбен немесе картонмен қапталған не нығайтылған түрінде импорттауға үш ай мерзімге тыйым салынады.
Бұл тыйым үшінші елдерден, яғни Еуразиялық экономикалық одаққа кірмейтін мемлекеттерден жеткізілетін өнімдерге қатысты. Құжат отандық кәсіпорындардың жүктемесін қамтамасыз ету және ішкі нарықты қорғау мақсатында әзірленгені атап өтілген.
Шешім «Сауда қызметін реттеу туралы» және «Ұлттық қауіпсіздік туралы» заңдарға, сондай-ақ Еуразиялық экономикалық одақ туралы шарттың ережелеріне сәйкес қабылданған. Тыйым барлық көлік түрлеріне қолданылады.
Бұйрық 2025 жылғы 22 шілдеден бастап күшіне енеді.
