Президент Қасым-Жомарт Тоқаев көлік қызметкерлерін кәсіби мерекелерімен құттықтау рәсімінде әуе жүктерін тасымалдауды дамыту және Қазақстанның өңірдегі жетекші авиациялық хаб ретінде қалыптасуы басты міндет екенін мәлімдеді, деп хабарлайды +7.kz.
Мемлекет басшысы әуе қатынасын дамытуға ерекше назар аудару қажет екенін айтты.
“Бүкіл ел бойынша авиация инфрақұрылымын жаңарту үшін кешенді жұмыс жүргізіліп жатыр. Мысалы, өткен жылы Алматы, Шымкент және Қызылордада жаңа терминалдар іске қосылды. Әуежайлардың өткізу қабілеті артты. Бұрын Алматы әуежайы жылына 2,5 миллион жолаушыға ғана қызмет көрсете алатын. Бүгінде бұл 14 миллионға дейін ұлғайды. Менің тапсырмаммен Зайсанда, Катонқарағайда және Кендірліде үш жаңа әуежай салынып жатыр. Арқалық әуежайы қалпына келтіріле бастады. Мұндай жобалардың жүзеге асуы жолаушылар санын арттырып қана қоймайды. Сонымен қатар логистика, туризм, сауда және басқа да қосалқы салалардың дамуына әсер етеді. Әуе рейстерінің географиясын кеңейту мақсатында тұрақты түрде жүйелі шаралар қабылдап жатырмыз. Қазіргі кезде Қазақстанның 30-дан астам елмен тікелей әуе қатынасы бар. Бірақ бұл аз, жұмыс жалғасады”, – деді мемлекет басшысы.
Қасым-Жомарт Тоқаев әуе арқылы жүк тасымалын дамытып, Қазақстанды аймақтағы жетекші авиациялық хабқа айналдыру қажет екенін мәлімдеді.
“Үкімет ұлттық жүк тасымалдаушы әуе компаниясын құру туралы жоспарын айтты. Жалпы, еліміздегі азаматтық авиация мен әуе арқылы жүк тасымалын дамыту мәселесі тек көлік қызметі ретінде қарастырылмайды. Оның ауқымы одан әлдеқайда кең. Бұл – еліміздің экономикалық өсіміне, халықаралық аренадағы орнына және егемендігіне тікелей әсер ететін стратегиялық вектор”, – деді Тоқаев.
Фото: Ақорда
