Блогерлер Ерболат Жанабылов пен Эльмира Толегенова ұйымдастырған конкурсқа байланысты іс сотқа жетті. Бұл істі Астанадағы мамандандырылған ауданаралық әкімшілік соты қарайды, деп хабарлайды +7.kz.
Туризм және спорт министрлігінің құмар ойын бизнесін және лотереяны реттеу комитеті Жанабыловтар өткізген ұтысқа шағым түскеннен кейін тексеріс бастаған. Анықталғандай, Ерболат Жанабыловқа тиесілі парақшада күн сайын ақша, автокөлік және басқа да бағалы сыйлықтар ойнатылған. Бұл әрекеттер лотерея қызметі туралы заңнаманы бұзу белгілеріне жатады.
“Осыған байланысты 26 тамызда Жанабыловқа ӘҚБтК-нің 445-1-бабы 6-бөлігі бойынша әкімшілік құқықбұзушылық туралы хаттама толтырылды. Оның адвокатының өтініші негізінде іс қарау үшін Астана қаласының мамандандырылған ауданаралық әкімшілік құқықбұзушылық істер жөніндегі сотына жолданды“, – деп мәлімдеді министрлік.
Комитеттің айтуынша, қазіргі таңда Жанабылованың жұбайы Эльмира Толегенованың әрекеттері де тексеріліп жатыр, оның қорытындысы бойынша тиісті шешім қабылданады.
Бұған дейін блогерлер Instagram-да 11 автокөлікті ойнататынын жариялаған. Бастапқыда шарты жай ғана репост жасау болған. Артынша ұтысқа қатысу үшін 30 мың теңге тұратын Zhana Business атты ақылы курс алу керек екендігі айтылған. Байқауға тек осы курсты сатып алғандар ғана қатыса алатыны белгілі болды.
Бұл жағдай жазылушылардың наразылығын тудырды. Олар құқық қорғау органдарынан схеманың заңдылығын тексеруді сұрады. Қаржы мониторингі агенттігі бұл материалдарды басқа мемлекеттік органдарға тексеру үшін жолдады.
