Мемлекет басшысының өкімімен Марат Кенжеғалиұлы Әшім Қазақстан Республикасы Президентінің кеңесшісі болып тағайындалды, деп хабарлайды +7.kz.
“Мемлекет басшысының өкімімен Марат Кенжеғалиұлы Әшім Қазақстан Республикасы Президентінің кеңесшісі – Президент Протоколы қызметінің бастығы лауазымына тағайындалды”, – делінген хабарламада.
Марат Әшім – 1987 жылы Алматы қаласында дүниеге келген.
2008 жылы Абай атындағы Қазақ ұлттық педагогикалық университетінде халықаралық құқық мамандығы бойынша бакалавр дәрежесін, 2010 жылы экономика және бизнес бакалавры дәрежесін алды.
2010 жылы Қазақстан Республикасы Президенті жанындағы Мемлекеттік басқару академиясының Дипломатия институтында магистратураны тәмамдады.
2008–2009 жылдары жеке компанияда заңгер болып жұмыс істеді.
2009 жылдан бастап Қазақстан Республикасы Сыртқы істер министрлігінің Әкімшілік және бақылау департаментінің кадрлар басқармасында атташе қызметін атқарды.
2010–2012 жылдары Қазақстан Республикасы Сыртқы істер министрлігінің Мемлекеттік хаттамалық қызметінде үшінші хатшы болды.
2012–2017 жылдары Қазақстан Республикасы Президенті Әкімшілігінің Хаттама бөлімінде референт, сарапшы, кеңесші, инспектор қызметтерін атқарды.
2017–2018 жылдары Қазақстан Республикасы Президенті Әкімшілігінің Хаттама бөлімінің сектор меңгерушісі болды.
2018 жылдың сәуірінен бастап Қазақстан Республикасы Президентінің Хаттамасы басшысының орынбасары болып жұмыс істеді.
2023 жылғы 15 наурызда Мемлекет басшысының өкімімен Қазақстан Республикасы Президенті Хаттамалық қызметінің бастығы болып тағайындалды.
Дипломатиялық дәрежесі – Екінші дәрежелі Төтенше және Өкілетті Уәкіл.
“Құрмет” орденімен, “Ерен еңбегі үшін” медалімен және өзге де мерейтойлық медальдармен наградталған.
