Еңбек және халықты әлеуметтік қорғау министрлігі бірнеше жерде жұмыс істеуге тыйым салынды деген ақпаратқа қатысты түсініктеме берді, деп хабарлайды +7.kz.
Ведомствоның мәліметінше, еңбек кодексіне сәйкес, ел азаматтары бір уақытта бірнеше жерде және әртүрлі жұмыс берушілерде еңбек ете алады. Дегенмен белгілі бір шектеулер сақталуы тиіс: негізгі жұмыста – 8 сағаттан, қосымша жұмыста – 4 сағаттан аспау керек, яғни барлығы 12 сағаттан көп болмауы тиіс.
Сонымен қатар қосымша жұмыста істейтіндер негізгі және қосымша жұмыстағы еңбек демалысын бір уақытта алуы қажет.
“Егер қосымша жұмыстағы ақылы жыл сайынғы еңбек демалысының ұзақтығы негізгі жұмыстағы демалыс ұзақтығынан қысқа болса, жұмыс беруші қызметкердің өтініші бойынша айырмашылық күндеріне жалақы сақталмайтын демалыс береді”, – деп қосты министрлік.
Мемлекеттік қызметкерлерге, сондай-ақ зиянды немесе қауіпті жағдайда жұмыс істейтіндерге қосымша еңбек етуге тыйым салынады.
Кеше мәжіліс кулуарында еңбек вице-министрі Олжас Анафин ведомство жұмыс берушілердің еңбек шарттары бойынша деректерді Бірыңғай еңбек шарттарын есепке алу жүйесіне (БЕШЕАЖ) енгізуін бақылап отырғанын айтты.
“Мониторингтің басты мақсаты – азаматтардың еңбек қатынастарын заңдастыру және олардың еңбек құқықтарын қамтамасыз ету”, – деп хабарлады министрлік.
Кандидаттың электрондық жеке ісіне қол жеткізу арқылы жұмыс беруші оның жеке куәлігі, білімі туралы дипломы, еңбек қызметі, тәжірибесі мен біліктілігі жөніндегі нақты деректерді ала алады.
Фото: depositphotos.com
