Алматылық “Қайрат” футбол клубы Чемпиондар лигасындағы ойындарға арналған қосалқы стадион ретінде елордадағы “Астана Арена” стадионын таңдады, деп хабарлайды +7.kz.
Vesti.kz басылымының мәліметінше, клуб Чемпиондар лигасындағы өз алаңындағы барлық ойындарын Алматыдағы Орталық стадионда өткізуді жоспарлап отыр. Алайда қысқы ойындардың Астанаға ауысу ықтималдығы бар.
“Ойындарды Астанада өткізу “Олимпиакос” пен “Брюгге” командаларына қарсы матчтарда қарастырылуда. Себебі Алматыда желтоқсан мен қаңтар айларында ойын өткізуге қолайсыз жағдайлар, әсіресе ауа температурасының төмендігі байқалуы мүмкін. “Орталық” стадионнан бөлек, “Қайрат” клубы қосалқы арена ретінде “Астана Арена” стадионын мәлімдеген. Демек, “Брюгге” және “Олимпиакос” клубтарына қарсы қысқы ойындардың елордада өтуі де ықтимал”, – деп жазады басылым.
Айта кетейік, УЕФА регламентіне сәйкес, Чемпиондар лигасы матчтарының кейінге қалдырылуына немесе өтпей қалуына себеп ретінде ауа температурасының төмендігі қарастырылады. Ұйым ойындарды -15 градусқа дейінгі температурада өткізуге рұқсат береді, ал одан төмен болған жағдайда шешімді төреші мен командалардың басшылығы қабылдайды.
Еске салсақ, алматылық “Қайраттың” Чемпиондар лигасындағы өз алаңындағы ойындары: 30 қыркүйек (“Реал Мадрид”), 21 қазан (“Пафос”), 9 желтоқсан (“Олимпиакос”) және 20 қаңтар (“Брюгге”) күндеріне жоспарланған. Қыркүйек пен қазандағы кездесулерге Алматының климаты кедергі келтірмейді, алайда қыста ауа температурасы айтарлықтай төмен болуы мүмкін.
