Бұған дейін алаяқтық бойынша күдікке ілінген “Құлагер” хоккей командасының басшысы Сергей Филь ұсталды, деп хабарлайды +7.kz.
Солтүстік Қазақстан облысы полиция департаменті баспасөз қызметінің мәліметінше, Астананың 45 жастағы тұрғыны екі немесе одан да көп адамға қатысты алаяқтық жасады деген күдікке ілінген.
“Ер адам полиция басқармасының уақытша ұстау изоляторына қамауға алынды. Қозғалған қылмыстық іс аясында сотқа дейінгі тергеу жүргізіліп жатыр. Қылмыстық-процестік кодекстің 201-бабына сәйкес, өзге мәліметтер бұл кезеңде жария етілмейді”, – делінген баспасөз хабарламасында.
Сергей Филь басқа өңірде ұсталды, ол Қазақстан Республикасының шегінен шықпаған.
Еске сала кетейік, бұған дейін 2025 жылғы 24 қыркүйектен бастап оның клуб өкілдерімен бірнеше рет байланыс орнатуға тырысқанына қарамастан, байланысқа шықпағаны хабарланған еді. Сондай-ақ клуб Сергей Фильге қатысты құқық қорғау органдарына ықтимал алаяқтық фактісі бойынша арыздар түскенін білген. “Құлагер” командасында бұл оқиғалардың оның командадағы қызметіне қатысы жоқ екені атап өтілді.
БАҚ-тағы ақпаратқа сәйкес, Сергей Филь Ресей азаматтығы бар хоккейшілерден Қазақстан паспорттарын жасатып беру үшін ақша жинап, кейін із-түзсіз жоғалып кеткен.
Фото: “Құлагер” ФК
