Индонезияның Шығыс Ява провинциясындағы Сидоарджо қаласында “Әл-Хозини” ислам мектебінің ғимараты құлап, 50 адам қаза тапты, деп хабарлайды +7.kz.
DetikJatim басылымының хабарлауынша, үйінді астында тағы 13 адам болуы мүмкін.
Жоғарғы қабаттарда құрылыс жұмыстары жүргізіліп жатқан кезде ғимарат құлап түскен. Нәтижесінде іргетас қосымша салмаққа төтеп бере алмаған.
Құтқарушылар 50 адамның денесінен бөлек, жеке дене қалдықтарын да тапқан, бұл құрбандардың жалпы санын 54-ке дейін арттыруы мүмкін. Іздеу-құтқару операциясы 6 қазан, дүйсенбі күні кешке дейін аяқталуы тиіс.
“Бұл – биылғы жылы Индонезияда болған ең ірі апат. Бұған дейін ешбір табиғи не техногендік оқиға мұншама адамның өмірін қиған емес”, – деді Ұлттық апаттардың салдарын жою агенттігі басшысының орынбасары Буди Иравана.
Дін істері министрлігінің мәліметінше, елде шамамен 42 мың исламдық мектеп-инфтернет жұмыс істейді. Алайда олардың шамамен 50-і ғана ресми құрылыс рұқсатына ие. “Әл-Хозини” мектебі олардың қатарына кірген-кірмегені әзірге белгісіз.
Фото: depositphotos.com (иллюстратция)
