Францияның жаңа премьер-министрі Себастьен Лекорню отставкаға кетті, деп хабарлайды +7.kz.
Елисей сарайының баспасөз қызметі президент Эммануэль Макрон оның отставкасын қабылдағанын мәлімдеді.
Себастьен Лекорню – Макронның жақын серіктесі. Бұл жаңалықтан кейін нарықта француз компанияларының акциялары мен еуро бағамы төмендеді.
Лекорню бір ай бұрын үкімет басшысы болып тағайындалып, бірнеше апта бойы жаңа командасын жинаған еді. 5 қазан, жексенбі күні ол министрлер тізімін жариялап, түрлі партиялардың қолдауына үміт артқан, бірақ ешкімнің көңілінен шықпаған. Оңшылдар кабинет тым жұмсақ десе, солшылдар оны керісінше, тым консервативті деп санады.
Үкімет құрамын жариялағаннан кейін оппозиция да, кейбір одақтастар да сенімсіздік вотумын енгізетінін мәлімдеді. Лекорню алғашқы отырыс өтпей жатып-ақ таңертең отставкаға кетті. Ол Эммануэль Макронның соңғы екі жыл ішіндегі бесінші премьер-министрі болды.
Фото: SCANPIX/EPА
