АҚШ Президенті Дональд Трамп Израиль мен ХАМАС арасындағы атысты тоқтату және тұтқындар алмасу туралы келісімнен кейін Израильге барды, деп хабарлайды +7.kz ақпарат агенттігі AP News басылымына сілтеме жасап.
Израиль президенті Ицхак Герцог пен премьер-министр Биньямин Нетаньяху Трампты әуежайда әскери оркестрдің сүйемелдеуімен қарсы алды. Екі жылға созылған соғыс кезінде үнемі наразылық шерулері өткен Тель-Авивтегі “Тұтқындар алаңында” жиналған жұрт Трампты қуана қарсы алған.
Дегенмен жағдай әлі де тұрақты емес. Израиль мен ХАМАС 2023 жылғы 7 қазанда басталған соғысты тоқтатуға бағытталған жоспардың алғашқы кезеңін енді ғана жүзеге асырып жатыр.
Бітімнің бірінші кезеңі бойынша:
– Хамас ұстаған соңғы 48 тұтқынды босатады;
– Израиль түрмелерінен жүздеген палестиналық босатылады;
– Газа секторына гуманитарлық көмек көлемі арттырылады;
– Израиль әскері Газаның негізгі қалаларынан ішінара шегінеді.
АҚШ президенті тағы бір рет соғыстық біткенін мәлімдеді.
“Соғыс бітті, жарай ма? Адамдар соғыстан шаршады, сондықтан бұл бітім ұзаққа созылады деп ойлаймын”, — деп қосты Трамп.
Трамп алдымен Израильде тұтқындардың отбасыларымен кездесіп, парламент — Кнессетте сөз сөйлейді.
Содан кейін ол Мысырға барып, президент Әбдел-Фаттах әс-Сисимен бірге Шарм-эш-Шейх қаласында 20-дан астам елдің басшылары қатысатын Таяу Шығыс пен Газадағы бейбітшілік саммитін өткізеді.
Израиль мен Мысыр Трампқа өз елдерінің ең жоғары азаматтық марапатын беретінін жариялады.
Алайда әлі нақты келісім орнаған жоқ. Келіссөздер сәтсіз аяқталса, Израиль әскери операцияларды қайта бастайтынын ескерткен.
Фото: Getty Images/Chip Somodevilla
