Парламент мәжілісінің жалпы отырысында AMANAT партиясының жаңа депутаты Әбутәліп Мүтәлі ант берді, деп хабарлайды +7.kz ақпарат агенттігі.
Әбутәліп Мүтәлі оқу-ағарту министрі қызметіне ауысқан Жұлдыз Сүлейменованың орнына келген
Бұған дейін AMANAT партиясының саяси кеңес бюросы мәжілістегі партиялық тізім бойынша бос мандатты президент жастар кадрлық резервінің мүшесі Әбутәліп Мүтәліге беру туралы қаулы қабылдағаны хабарланған.
“Қазақстан халқына адал қызмет етуге, Қазақстанның тұтастығы мен тәуелсіздігін нығайтуға, оның Конституциясы мен заңдарына қатаң бағынуға, депутаттың өзіме жүктелген мәртебелі міндеттерін адал атқаруға ант етемін”, – деді Әбутәліп Мүтәлі.
Партия таратқан мәліметке сүйенсек, AMANAT фракциясының жаңа депутаты “Болашақ” бағдарламасының түлегі, бұған дейін цифрлық технологиялар мен жасанды интеллект бағытында еңбек етіп келген.
Сондай-ақ, Әбутәліп Мүтәлі Мәжілістің экономикалық реформа және өңірлік даму комитетінің құрамына сайланды.
Фото: Видеодан скрин
