Қаржылық мониторинг агенттігі “СҚ-Фармация” компаниясына қатысты бюджет қаражатын жымқыру фактісі бойынша тергеу жүргізіп жатыр, деп хабарлайды +7.kz ақпарат агенттігі.
Бұл туралы агенттік төрағасының орынбасары Жеңіс Елемесов мәлімдеді.
“Иә, бюджет қаражатын жымқыру фактісі бойынша қылмыстық іс тіркелді. Тергеу амалдары жүргізіліп жатыр, алайда тергеу мүддесіне байланысты толық ақпарат жария етілмейді”, – деді Жеңіс Елемесов Сенат кулуарында.
Бұған дейін Мәжіліс депутаты Бақытжан Базарбек әріптесі Мұрат Әбеновпен бірге берген өтініш негізінде “СҚ-Фармация” ЖШС қатысты тергеу басталғанын хабарлаған болатын.
Биыл маусымда қылмыстық құқықбұзушылық белгілері бар аудит материалдары Бас прокуратураға шара қабылдау үшін жолданған еді.
Фото: baq.kz
