Жамбыл облысында вагондарды тарату кезінде үш жүк вагонының соқтығысқаны туралы ақпарат тарады. Жағдайға қатысты “Қазақстан темір жолы” ұлттық компаниясының баспасөз қызметі пікір білдірді, деп хабарлайды +7.kz ақпарат агенттігі.
Желіде тараған ақпаратта вагондардың рельстен шығып кеткені айтылған.
“Кейбір дереккөздердің мәліметінше, 20 желтоқсанда Жамбыл облысында сұрыптау дөңесінен вагондарды тарату барысында үш жүк вагонының бүйірінен соқтығысуы орын алған. Нәтижесінде үш вагон да барлық доңғалақ жұптарымен рельстен шығып, қырынан құлаған”, – делінген жазбада.
Дереккөздің хабарлауынша, екі вагонда Қорғаныс министрлігінің әскери-техникалық мүлкі тасымалданған.
“Қазақстан темір жолы” ұлттық компаниясы Түрксіб станциясында вагондарды тарату жұмыстары кезінде жолға шығып бара жатқан жүк пойызымен бүйірлік соқтығыс болғаны хабарланды.
“Оқиға салдарынан қаза тапқандар мен зардап шеккендер жоқ. Пойыз қозғалысында кідіріс болған жоқ, оқиға басқа құрамдардың жүру кестесіне әсер еткен жоқ. Қалпына келтіру жұмыстары жедел түрде жүргізілді”, – деп мәлімдеді компания өкілдері.
Қазіргі таңда Түрксіб станциясы қалыпты режимде жұмыс істеп жатқаны нақтыланды.
Қорғаныс министрлігі де оқиғаны растады, алайда вагонда әскери техника, қару-жарақ және оқ-дәрілер болмағанын мәлімдеді.
“20 желтоқсанда Жамбыл облысындағы Түрксіб станциясында маневрлік жұмыстар барысында вагондардың рельстен шығуы тіркелді. Онда тылдық мақсаттағы мүлік тасымалданған. Құрамда әскери техника, қару-жарақ және оқ-дәрілер болған жоқ”, – деп хабарлады ведомство.
Материалдық шығын көлемі тексеру қорытындысы бойынша комиссия тарапынан анықталатыны айтылды.
Фото: depositphotos.com
