Ұлттық экономика министрі Серік Жұманғарин 2026 жылы Қазақстанда зейнетақылар мен жәрдемақылардың қаншаға өсетінін айтты, деп хабарлайды +7.kz ақпарат агенттігі.
Үкіметтегі брифинг барысында вице-премьер 2026 жылға арналған бюджетте зейнетақылар мен жәрдемақыларды 10 пайызға арттыру көзделгенін мәлімдеді.
“Салыстырмалы түрде алғанда, 2025 жылы өсім 8,5 пайыз болды. 2026 жылғы бюджетте зейнетақылар мен жәрдемақыларды ұлғайтуға ғана 636 миллиард теңге қарастырдық”, – деді Жұманғарин.
Ол индексацияның азаматтарды қолдауға бағытталған кең ауқымды бағдарламаның бір бөлігі екенін атап өтті.
Сондай-ақ Жұманғарин Ұлттық банк, қаржы нарығын реттеу және дамыту агенттігі және үкіметтің экономикалық тұрақтылықты қамтамасыз ету мен азаматтарды қолдауға бағытталған бірлескен іс-қимыл бағдарламасы бар екенін еске салды.
“Біз Ұлттық банк, қаржы нарығын реттеу және дамыту агенттігі және үкіметтің бірлескен іс-қимыл бағдарламасын жасадық. Мұнда тек зейнетақылар мен жәрдемақыларды индексациялау ғана емес, шағын және орта бизнесті қолдау мәселесі де қамтылған. Бұл өте маңызды”, – деді ол.
Бұған дейін Қазақстанда зейнетақының қазіргі мөлшері аталған болатын. Атап айтқанда, 2025 жылғы 1 қарашадағы жағдай бойынша жиынтық зейнетақының орташа мөлшері 142 744 теңгені құрады, оның ішінде ынтымақты зейнетақы – 95 167 теңге, базалық зейнетақы – 47 577 теңге.
Фото: depositphotos.com
