Мәжіліс “Қазақстан Республикасындағы банктер және банк қызметі туралы” Заңға және оған ілеспе құжаттарға Сенат жаңа редакцияда ұсынған жекелеген баптармен келісті, деп хабарлайды +7.kz ақпарат агенттігі.
Бұл түзетулер банк секторын реттеудегі маңызды мәселелерге қатысты.
Атап айтқанда, банк құпиясын сақтау талаптары қазынашылық органдарға да қолданылатын болады.
Деректер витринасын енгізудің мақсаттары мен онда қамтылатын ақпараттың тізімі нақтыланды. Осы нормаларды іске асыру мерзімі 2026 жылғы 1 маусымнан 2027 жылғы 1 қаңтарға ауыстырылды.
Сондай-ақ банктің базалық лицензиядан әмбебап лицензияға өтуі кезінде пруденциялық нормативтерді сақтау талаптары нақты көрсетілді.
Бұдан бөлек, Қазақстан Республикасының резиденті емес ислам банктерінің филиалдарына инвестициялық қызметтің жекелеген түрлерін жүзеге асыру құқығы беріледі.
Жалпы, енгізілген өзгерістер банк қызметін жетілдіруге, қаржы жүйесінің ашықтығын арттыруға және елдің қаржы нарығын дамытуға бағытталған.
Еске сала кетейік, 25 желтоқсанда Сенатта банктер туралы заң жобасы бірінші оқылымда қаралды. Талқылау барысында депутат Амангелді Нұғманов банктерге қойылатын тым қатаң талаптар несиелердің қолжетімділігін төмендетуі мүмкін екенін айтты.
“Реттеуді шамадан тыс күшейту несие ресурстарының қолжетімділігінің азаюына, инвестициялық белсенділіктің әлсіреуіне және экономиканың нақты секторына қаржы ағындарының қысқаруына әкелуі мүмкін”, – деді депутат.
Сенатордың айтуынша, маңызды мәселелер бойынша сарапшылар мен мемлекеттік органдар нақты әрі түсінікті жауап бермеген. Сондықтан банктерді бақылауды күшейту олардың тұрақты жұмысына және экономиканың дамуына кедергі келтірмеуі үшін заңды қайта пысықтау қажет.
Сенат төрағасы Мәулен Әшімбаев бұған дейін бас комитет заңның кейбір баптарын мақұлдамауды ұсынып, оларды жаңа редакцияда қарау үшін Мәжіліске қайтаруды ұсынғанын хабарлаған. Түзетулер кестесінде барлығы 16 өзгеріс көрсетілген.
Фото: depositphotos.com
