Air Astana әуе компаниясының Сеул – Астана бағыты бойынша KC210 рейсін орындап келе жатқан ұшағы борттағы барлық дәретханалардың істен шығуына байланысты Пекин әуежайына шұғыл қонды, деп хабарлайды +7.kz ақпарат агенттігі.
Air Astana мәліметінше, рейс Сеул қаласынан жергілікті уақыт бойынша сағат 09:25-те ұшып шығып, Пекинге 11:50-де сәтті қонған.
“Ұшақ техникалық себеппен — борттағы барлық дәретханалардың істен шығуына байланысты мәжбүрлі қону жасады. Қазіргі уақытта ақауды жою үшін қосалқы бөлшек жеткізілуі күтілуде, ал рейстің ұшуы жергілікті уақыт бойынша сағат 01:00-ге ауыстырылды”, — деп нақтылады әуе компаниясының баспасөз қызметі.
Виза қажет емес жолаушылар үшін әуе компаниясы Қытай шекара қызметінің басшылығына қалаға шығуға және қонақүйге орналастыруға рұқсат беру жөнінде ресми өтініш жолдаған. Ал қалған жолаушылар транзиттік аймақта қалады, оларға тамақ, сусындар мен көрпелер ұсынылады. Компания өкілдері туындаған қолайсыздық пен рейстің кешігуіне байланысты жолаушылардан кешірім сұрады.
Фото: Air Astana
