Шымкенттің бұрынғы әкімі Ғабидолла Әбдірахымов “Самұрық-Қазына Констракшн” АҚ-да операциялық қызмет жөніндегі басқарма төрағасының орынбасары болып тағайындалды, деп хабарлайды +7.kz ақпарат агенттігі.
Оның Түркістан облысындағы газ электр станциясының құрылысына жасаған жұмыс сапары компанияның әлеуметтік желідегі парақшаларында жарияланды. Қордың ресми сайты әзірге жаңартылмағанымен, баспасөз қызметі Әбдірахымовтың бұл қызметке 2025 жылғы 29 желтоқсанда тағайындалғанын растады.
Шымкенттің бұрынғы әкімі Ғабидолла Әбдірахымов 2021 жылдың күзінен бастап мемлекеттік құрылымдардан кеткен.
Оның 2019 жылы Лондонда түсірілген видео мен Арыс қаласындағы наразылық кезінде ер адамдар “әйелдерін басқаруы керек” деген мәлімдемелері дау тудырған еді. Артынша ол қызметінен босатылған.
Ал 2023 жылы оған аса ірі көлемдегі алаяқтық бойынша айып тағылды. Сол кезде кәсіпкер Сайдулла Қожабаев Абдрахимовты, Карим Мәсімовті және тағы үш адамды өз мүлкін заңсыз иемденді деп айыптаған.
Фото: gov.kz
