Семей қаласының тұрғыны жұмыстан қайтып келе жатқан кезде бейтаныс қыздың оның ілесіп, боқтық сөз айтып, оғаш мінез танытып, қорқытқан видеосы тараған еді. Түнгі уақытта қудалау дерегі бойынша қызға айыппұл салынды, деп хабарлайды +7.kz ақпарат агенттігі.
Сот 24 жастағы қыздың әрекетін ұсақ бұзақылық ретінде бағалап, қоғамдық орында бейәдеп сөздер қолданғаны үшін 85 мың теңге айыппұл салды. Аталған жаза тек осы құқықбұзушылыққа қатысты тағайындалған.
Алайда жәбірленуші соттың шешімі әділ емес екенін айтып, қоқан-лоқы көрсету мен қудалау деректеріне тиісті құқықтық баға берілмегенін алға тартты. Сондай-ақ ол полиция мен прокуратураның жұмысына наразылығын білдірді.
29 қаңтар күні Сенат кулуарында ішкі істер министрінің орынбасары Игорь Лепеха бұл жағдайға қатысты түсініктеме берді. Оның айтуынша, сталкингке қарсы заң жақында ғана қолданысқа енгізілген.
“Бұл заң толыққанды жұмыс істейді, алайда белгілі бір құқықтық тәжірибе қалыптасуы үшін уақыт қажет. Қазіргі кезде біз қызметкерлерді оқыту жұмыстарын жүргізіп жатырмыз. Ал осы нақты оқиғаға байланысты барлық материалдар қайта қаралып, мән-жайы егжей-тегжейлі тексеріледі. Қажет болған жағдайда қосымша шаралар қабылданады”, — деді ол.
Желі қолданушылары мен жәбірленуші тарап бұл оқиғаға берілген құқықтық бағаны жеткіліксіз деп санайды.
