Алматы тауларында қар көшкіні салдарынан турист қаза тапты, деп хабарлайды +7.kz ақпарат агенттігі.
Қайғылы оқиға 22 ақпан күні таңертең болған. ТЖМ баспасөз қызметінің мәліметінше, төрт адамнан құралған топ Титова асуында жүрген кезде қар көшкіні болған. Қалың қардың астында екі турист қалып қойған.
Олардың бірі өз күшімен қар астынан шығып үлгерген. Ал екіншісін қар толықтай басып қалған.
Оқиға орнына Алматы қалалық ТЖД-ның №23 құтқару бөлімшесінің мамандары, “Барыс” республикалық жедел-құтқару жасағының қызметкерлері, кинологтар мен еріктілер жұмылдырылды. Іздеу-құтқару жұмыстары барысында ұшқышсыз ұшу аппараты да қолданылған.
“Құтқару операциясы бірнеше сағатқа созылып, нәтижесінде марқұмның денесі қар астынан шығарылды. Оқиға орнында полиция қызметкерлері мен құтқару қызметінің психологтары жұмыс істеді”, – делінген ТЖД хабарламасында.
Еске салсақ, 22 ақпанда Сухой Лог аумағында қар көшкіні астында қалған ер адам құтқарылған еді.
