25 ақпанда Қарағанды облысында жоспарлы оқу-жаттығу ұшуын орындау кезінде Су-30СМ жойғыш ұшағы апатқа ұшырады, деп хабарлайды +7.kz ақпарат агенттігі.
Ресми мәліметке сәйкес, ұшақ экипажы дер кезінде катапульт жасап үлгерген.
“Су-30СМ жойғыш ұшағының ұшқыштары тірі, олардың өмірі мен денсаулығына қауіп жоқ. Олар медицина мамандарының бақылауында. Құлаған аймақ қоршауға алынды. Халық пен инфрақұрылым нысандарына қауіп төнген жоқ”, – деп хабарлады Қорғаныс министрлігінің баспасөз қызметі.
Оқиғаның себептері мен мән-жайын анықтау үшін Ұшу қауіпсіздігі департаментінің басшысы жетекшілік ететін Қорғаныс министрлігінің арнайы комиссиясы құрылды. Комиссия құрамына авиация қызметінің бейінді мамандары енгізілді.
Тергеу қорытындысы бойынша құқықтық баға беріліп, процессуалдық шешім қабылданады.
Су-30СМ жойғыш ұшағы Қарағандыдағы “Сары-Арқа” әуежайынан екі шақырым жерде құлаған.
Фото: gov.kz
