Ұлттық банк төрағасы Тимур Сүлейменов доллар бағамының құлдырау себебін айтты, деп хабарлайды +7.kz ақпарат агенттігі.
Сүлейменов доллар бағамы экспорттық түсімге тікелей байланысты екенін алға тартты.
“Бағамның өскені бізге ұнамайтыны анық. Төмендегені де ұнамай ма сонда? Яғни, теңге нығайып жатыр деуге болады. Бірақ бұл – базалық экономика. Қазақстанның негізгі экспорттық тармағы – бағасы өсіп келе жатқан мұнай және ол экспорттық түсімнің 50 пайыздан астамы. Көлем сол күйінде қалғанымен баға өсіп жатыр. Соған сәйкес экономикаға түсетін экспорттық түсім көлемі де, валюта нарығында ұсынылатын қаражат та артады. Демек, бірлік бағасы, яғни доллар бағамы төмендейді”, — деп түсіндірді Ұлттық банк басшысы.
Осы ретте БАҚ өкілдері одан доллар бағамы құлдырауы аясында Ұлттық қор қаншалық шығынға ұшырағанын және қаражатын доллармен сақтап отырған отандастарына қандай кеңес берерін сұраған еді.
“Ұлттық қор жоғалтуы немесе жоғалтпауы мүмкін емес. Өйткені Ұлтық қордың валюталық бөлігіне қараймыз. Ол доллармен сақталған. Біз инвестициялық кеңес бере алмаймыз”, – деді Тимур Сүлейменов.
Сонымен қатар, ол теңгені тұрақты валюта деп атады.
“Қазақстан теңгесі өзінің тұрақтылығын дәлелдеді. Естеріңізде болса, жекелеген сарапшылар кезінде 1 доллар мың теңге, 2 мыңге болатынын айтқан еді. Сол уақытта біз оған іргелі де, нарықтық да алғышарттардың мүлдем жоқ екенін айтқан болатынбыз. Дегенмен, тәжірибе көрсетіп отырғандай, теңге – тұрақты валюта. Өткен жылдың қорытындысында ол өте жақсы табыстылығын көрсетті. Қазіргі уақыттта ең тартымды валюталардың бірі. Сіздер де халықаралық рейтингтерден, басқаларынан көріп отырсыздар”, – деді Ұлттық банк төрағасы.
2026 жылғы 1 наурыздағы жағдай бойынша Қазақстан Республикасының Ұлттық банкіндегі валюта бағамдары: АҚШ доллары – 478,77 теңге; еуро – 548,62 теңге; ресей рублі – 5,78 теңге; қытай юані – 69,31 теңге.
