Қазақстанның энергетика министрлігі Новороссийск портына дрон шабуылына байланысты мәлімдеме жасады, деп хабарлайды +7.kz ақпарат агенттігі.
Кеше дрондар шабуылы кезінде “Шесхарис” терминалы зардап шеккені хабарланған еді.
Министрлік мәліметінше, жағдай тұрақты бақылауда. Қазіргі ақпаратқа сәйкес, аталған оқиға Қазақстан мұнайының экспорт көлеміне әсер етпеген.
“Бүгінгі таңда магистральдық мұнай құбырлары жүйесі арқылы қазақстандық мұнайды қабылдау және тасымалдау қалыпты жұмыс режимінде жүргізілуде. Экспорттық жоспарлар кестеге сәйкес орындалуда”, — деді Энергетика министрінің кеңесшісі, ресми өкілі Әсел Серікпаева.
Бұған дейін ресейлік БАҚ 5 сәуір, жексенбі күні Краснодар өлкесіне дрондармен шабуыл жасалғанын хабарлаған болатын. Ең үлкен шығын Новороссийск қаласында тіркеліп, 8 адам зардап шеккен.
Шабуылдың басты нысаны — “Шесхарис” мұнай құю терминалы. Бұл Ресейдің оңтүстігіндегі мұнай мен мұнай өнімдерін тиеуге арналған ең ірі кешендердің бірі әрі Новороссийск теңіз порты үшін стратегиялық маңызы зор нысан.
Аталған терминал арқылы, соның ішінде, қазақстандық мұнай да транзиттеледі. Дегенмен оның негізгі бөлігі Новороссийск қаласында орналасқан Каспий құбыр консорциумының (КТК) теңіз терминалы арқылы экспортталады.
Айта кетейік, өткен жылдың күзінде де “Шесхарис” терминалы дрондар шабуылына ұшыраған. Сол кезде мұнай базасы мен жағалаудағы инфрақұрылымға зақым келгені хабарланған. Алайда Қазақстанның Энергетика министрлігі мұнайды қабылдау мен тасымалдау штаттық режимде, ешқандай шектеусіз жүргізілгенін мәлімдеген еді.
Фото: 24tv.ua
