Фото: istockphoto.com
Әуежайда рейске тіркеу кезінде қойылған сұраққа «иә» деп жауап берген Алматы тұрғынына айыппұл салынды, деп хабарлайды +7.kz порталы.
Астанаға ұшпақ болған 30 жастағы алматылықтан әуежай қызметкері әдеттегідей сөмкесінде тыйым салынған заттардың бар-жоғын сұраған, ер адам: “Иә” деп жауап беріп, артынша қалжыңдағанын айтқан.
Алайда қауіпсіздік қызметі бұл сөзді әзіл деп қабылдамаған. Қауіп болуы мүмкін деген ақпарат тіркеліп, әуежай тексерілген. Ер адам ұсақ бұзақылық жасағаны үшін жауапқа тартылып, айыппұл арқалады.
Полиция қауіпсіздікке қауіп төндіретін кез келген сөз, тіпті «әзілдеп» айтылған болса да, құқық бұзушылық болып саналатынын ескертеді.
