Айзат Жұманованың өліміне күдікті күйеуі Айбар Жанболат 14 жылға сотталды, деп хабарлайды +7.kz ақпарат агенттігі.
Айыпталушы сот үкімімен марқұм Айзат Жұманованың отбасына моральдық зиян үшін 20 миллион теңге өтемақы төлеуге міндеттелді.
Бұған дейін мемлекеттік айыптаушы соттан Айбар Жанболатқа орташа қауіпсіздік деңгейіндегі түзеу мекемесінде жазасын өтей отырып, 15 жылға бас бостандығынан айыруды сұраған. Сондай-ақ бұлтартпау шарасы ретінде қамауда ұстауды өзгеріссіз қалдыруды талап етті.
Айыптаушы тарап жәбірленушілердің пайдасына Қылмыстық кодекстің 98-бабының 2-бөлігіне сәйкес 30 АЕК көлемінде өтемақы өндіріп алуды ұсынған.
Сот отырыстарының бірінде прокурор қайғылы оқиға болған күні тергеу әрекеттеріне қатысқан анықтаушы Дәулет Кәріпжановты қосымша куәгер ретінде жауапқа шақыру туралы өтініш білдірді.
Қайғылы оқиға 2025 жылғы 21–22 маусымға қараған түні Алматы облысы Ақсу ауданына қарасты Баласаз ауылында болған. Отбасылық жанжал кезінде күйеуінің қол жұмсауынан Айзат Жұманова қаза тапқан.
