АҚШ-тың Нью-Джерси штатындағы Хаммонтон қаласында екі тікұшақ соқтығысып, бір адам қаза тапты, деп хабарлайды +7.kz ақпарат агенттігі NBC News басылымына сілтеме жасап.
Хаммонтон муниципалдық билігінің мәліметінше, полицияға апат туралы хабарлама жергілікті уақытпен сағат 11:25-те түскен. Соқтығысудан кейін екі тікұшақ та жерге құлаған, олардың бірі өртеніп кеткен.
Апат салдарынан бір ұшқыш оқиға орнында көз жұмды, екіншісі ауыр жарақаттармен ауруханаға жеткізілді.
Оқиға куәгерлерінің айтуынша, қатты жарылыс дыбысы естілген. Тікұшақтар бір орында айналып ұшып, кейін биіктігін күрт жоғалта бастаған.
Азаматтық авиация федералдық басқармасының дерегіне сәйкес, Хаммонтон әуежайының маңында Enstrom F-28A және Enstrom 280C үлгідегі тікұшақтар әуеде соқтығысқан. Әр әуе кемесінде тек бір-бір ұшқыш болған.
Қазіргі таңда оқиға бойынша АҚШ-тың Көліктегі қауіпсіздік жөніндегі ұлттық кеңесінің басшылығымен тергеу жұмыстары жүргізіліп жатыр.
Фото: nbcnews.com
