Алматы әуежайында ер адам өзін өртемек болды, деп хабарлайды +7.kz.
Оқыс оқиғаның бейнежазбасы әлеуметтік желіде тарады.
Көліктегі полиция департаментінің мәліметінше, сағат 22:06-да ер адам әуежай кассасы маңында өзін-өзі өртеуге әрекет жасаған. Полиция қызметкерлері әуежайдың қауіпсіздік қызметімен бірлесіп шұғыл өртті сөндіріп, жедел жәрдем шақырған.
“Аталған дерек бойынша көлік полициясы департаменті қылмыстық іс қозғады. Қазіргі уақытта тергеу іс-шаралары жүргізіліп, оқиғаның барлық себептері мен мән-жайлары анықталып жатыр”, – деп хабарлады Алматы қалалық көліктегі полиция департаменті.
Ер адам қалалық ауруханаға жеткізілді. Ер адамның жағдайы туралы Алматы қоғамдық денсаулық сақтау басқармасының баспасөз қызметі хабарлады.
Ведомствоның мәліметінше, пациент жедел медициналық жәрдем бригадасымен № 4 қалалық клиникалық ауруханаға жеткізілді, жансақтау бөліміне жатқызылды.
“Науқастың жағдайы өте ауыр. Қазақстан Республикасы денсаулық сақтау министрлігінің хаттамасына сәйкес толық көлемде ем қабылдап жатыр”, – делінген хабарламада.
