Нұрлан Әбдірахым Алматы қаласы әкімінің орынбасары болып тағайындалды, деп хабарлайды +7.kz.
Бұл қызметте Әбдірахым денсаулық сақтау, жұмыспен қамту және әлеуметтік бағдарламалар мәселелеріне жетекшілік етеді.
Нұрлан Әбдірахым 2023 жылдың сәуірінен бастап Алматы облысы әкімінің бірінші орынбасары болып қызмет атқарған.
Ол “Қайнар” университетін және Қазақстан Республикасы Президенті жанындағы Мемлекеттік басқару академиясының Ұлттық мемлекеттік саясат мектебін бітірген. Заңгер, “саясаттану” мамандығы бойынша әлеуметтік білімдер магистрі.
Нұрлан Абдрахим еңбек жолын 2001 жылы “Астанаэнергосервис” АҚ абоненттік учаскесінің бақылаушысы болып бастаған. Әділет министрлігінде жұмыс істеп, жетекші маманнан департамент директоры және Зияткерлік меншік комитетінің төрағасына дейінгі қызметтерді атқарған.
Сондай-ақ әр жылдары Президент Әкімшілігінде мемлекеттік инспектор және бөлім меңгерушісінің орынбасары болып жұмыс істеген. “Құрмет” орденімен және мерейтойлық медальдармен марапатталған.
Еске салайық, Алматының жаңа әкімі Дархан Сатыбалды қызметіне кіріскеннен кейін қала әкімдігінде кадрлық ауыс-түйістер басталды. Соңғы уақытта бірнеше негізгі лауазым иелері ауыстырылды. 7 тамызда Алматы әкімінің орынбасары қызметінен Әсем Нұсупова, ал 14 тамызда Асқар Әмрин кеткені белгілі болған еді.
Фото: Алматы қаласы әкімдігі
