Алматыда автобус жүргізушісі мен жолаушының арасында жанжал шықты, деп хабарлайды +7.kz.
Жанжалдың видеосы әлеуметтік желіде тарады. Жолаушы жүргізушінің автобус айдап бара жатып телефон қолданғанына ескерту жасаған.
Видеода жолаушы жүргізушіге рульде отырып телефон пайдалануға болмайтынын айтады. Жүргізуші ескертуге ашуланып, ер адамға “Жоғал” деп жауап берген. Ашуланған жүргізуші автобусты тоқтатып, жолаушыны сыртқа итеріп шығармақ болған. Артынша жүргізуші ер адам автобустан түспейінше әрі қарай жүрмейтінін айтқан.
Алматы қалалық полиция департаменті бұл факті бойынша тексеру жүргізіліп жатқанын мәлімдеді.
“Жүргізушінің әрекетіне заңнама талаптарына сәйкес құқықтық баға беріледі”, – деп мәлімдеді полиция басқармасы.
“Алматыэлектротранс” компаниясы бұл оқиға бойынша тексеру жүргізілгенін, ал жүргізушіге компанияның ішкі ережелеріне сәйкес шара қолданылатынын жеткізді.
“Компания атынан жолаушылардан бұл жағымсыз оқиға үшін кешірім сұраймыз. Жолдағы қауіпсіздік – біздің басты басымдығымыз. Жүргізушінің қозғалыс кезінде телефон пайдалануы мүлдем жол берілмейтін жағдай. Сол сияқты, жолаушылар да жүргізушіні алаңдатпауы немесе салонда жанжал туындатпауы тиіс, себебі бұл барлық жол қозғалысына қатысушылардың өмірі мен денсаулығына қауіп төндіруі мүмкін”, – деді компанияның баспасөз қызметі.
Посмотреть эту публикацию в Instagram
