Президент Қасым-Жомарт Тоқаев Алматыдағы “Бағанашыл” балалар үйін Қонаев қаласына көшірмеу туралы тапсырма берді, деп хабарлайды +7.kz.
Президенттің кеңесшісі Руслан Желдібайдың хабарлауынша, мемлекет басшысының тапсырмасымен балалар көшірілмейтін болды.
“Алматы қаласындағы “Бағанашыл” балалар үйінің тәрбиеленушілерін Қонаевқа көшіру жоспарына қатысты туындаған жағдаймен танысқаннан кейін, Президент Қасым-Жомарт Тоқаев Алматы әкімі Дархан Сатыбалдыға балалар үйін жөндеуден өткізіп, тәрбиеленушілердің оқуын оңтүстік астанада жалғастыруды қамтамасыз етуді, сондай-ақ бұл нысанды қала балансына қабылдауды тапсырды”, – деп жазды Руслан Желдібай.
Қалыптасқан жағдайға байланысты Президент Әкімшілігі қызметтік тергеу жүргізетін болады.
“Балалар үйінің тәрбиеленушілеріне заңнамада кепілдік берілген барлық құқықтар толық көлемде сақталады”, – деп қосты Руслан Желдібай.
2025 жылдың наурыз айында облыстық №1 балалар үйін Алматыдан Қонаев қаласына көшіру жоспарланғаны белгілі болды. Қоғам белсенділері Алматының элиталық аудандарының бірі – Бағанашылда орналасқан бұл жер телімі кейбір құрылыс компанияларының қызығушылығын тудырғанын, олар бұл жерде тұрғын үй кешенін салғысы келетінін айтқан болатын. Балалар үйінің тәрбиеленушілері Қонаевтағы жаңа ғимаратқа көшірмеуді сұрап, видеоүндеу жолдады.
Кейін Алматы облысының әкімі Марат Сұлтанғазиев облыстық №1 балалар үйінің тәрбиеленушілері Алматыдан қала сыртындағы жаңа ғимаратқа көшірілмейтінін мәлімдеген.
Алайда 11 шілдеде Мәжіліс депутаты Бақытжан Базарбек мекемені көшіру туралы бұйрықтың жарияланғанына байланысты ашуын білдіріп, наурыз айында билік балаларды Алматыдан көшірмейміз деп уәде бергенін еске салды.
Кейінірек балалардың Қонаевқа жіберіліп жатқаны белгілі болды.
Фото: ҚМА
View this post on Instagram
