Алматы тұрғындарына жер сілкінісі болғаны туралы хабарлама келіп, қалада сиреналар ойнады, деп хабарлайды +7.kz.
Алайда әлеуметтік желіде алматылықтар жер дүмпуі сезілмегенін айтып жатыр.
Алматы қаласының Төтенше жағдайлар департаменті сейсмодатчиктердің деректері бойынша Қырғызстан аумағында сейсмикалық белсенділік тіркелгенін хабарлады. Бірақ ол халық пен инфрақұрылым нысандарына қауіп төндірмеді.
“Сейсмикалық оқиға туралы хабарлама автоматты түрде жіберілді. Бұл хабарлама жүйенің тестілік режимдегі жұмысының бір бөлігі және қате емес. Ұлттық сейсмологиялық бақылау және зерттеу орталығының датчиктері мен жабдықтарын MassAlert жаппай хабарлау жүйесіне байланыстыру жұмыстарын жүргізіп жатыр”, — деп хабарлады ТЖД.
Ресми мәліметіне сәйкес, мамандар сейсмикалық станциялар мен датчиктерді зерттеп, оқиғаның барлық мән-жайын анықтайды.
“Халыққа жолданатын хабарламалар болашақта барынша нақты әрі түсінікті болуы үшін параметрлер мен алгоритмдерді нақтылау және баптау жұмыстары жүргізілуде”, — деп мәлімдеді департамент.
Еуропа-Жерорта теңізі сейсмологиялық орталығының мәліметінше, жерасты дүмпулері Астана уақытымен 12:20-да Қырғызстан аумағында тіркелген. Зілзаланың магнитудасы – 3,4. Жер сілкінісінің эпицентрі Алматыдан 156 шақырым оңтүстікте орналасқан.
