Apple компаниясының тарихтағы ең қымбат телефоны бүктемелі iPhone болмақ, оның 1800 бен 2000 АҚШ доллары аралығында болады деп жоспарланған, деп хабарлайды +7.kz UBS инвестициялық банкінің сарапшыларына сілтеме жасап.
Бұл компания тарихындағы ең қымбат iPhone болады, тіпті бастапқы бағасы 1599 доллардан басталатын MacBook Pro-дан да қымбат.
Жаңа құрылғы туралы не белгілі?
UBS мәліметінше, бүктемелі iPhone қазіргі ең жоғары деңгейлі модельдерден де қымбат болады. Мысалы, iPhone 15 Pro Max бағасы 1199 доллардан басталады. Осылайша, Apple бүктемелі Samsung флагмандарының бағасымен теңеседі, АҚШ-та Galaxy Z Fold 7 бағасы 1999 доллардан басталады.
Сарапшылар құрылғының қалыңдығы қандай болатыны туралы болжамдарымен де бөлісті. Weibo әлеуметтік желісіндегі қытайлық Instant Digital аккаунтының мәліметінше, бүктемелі iPhone ашық күйінде кемінде 4,8 миллиметр қалыңдықта болады. Салыстырар болсақ, Galaxy Z Fold 7 — небәрі 4,2 миллиметр.
Бұған дейін танымал сарапшы Мин-Чи Куо iPhone-ның ашылған кездегі қалыңдығы небәрі 4,5 миллиметр болады деп болжаған еді. Алайда соңғы мәліметтерге сүйенсек, Apple бұл межеге жете алмауы мүмкін.
Сарапшылардың мәліметінше, жаңа модельдің жаппай өндірісі 2026 жылдың екінші жартысында басталады. Демек, жаңа құрылғының таныстырылымы сол жылы өтуі мүмкін.
Айта кетейік, Apple бүктемелі құрылғылар нарығына едәуір кеш қосылуда, Samsung мұндай модельдерді 2019 жылдан бері шығарып келеді. Алайда Купертино қаласындағы компания үшін «асықпай, сапалы жасау» басты қағида екені белгілі. Бұл тәсілдің нәтижесі қандай болатынын 2026 жыл көрсетеді.
