Армения премьер-министрі Никол Пашинян жүк транзитіне қатысты Әзербайжан президенті Ильхам Әлиевтің маңызды мәлімдемесінен кейін Қазақстан президенті Қасым-Жомарт Тоқаевқа алғыс айтты, деп хабарлайды +7.kz ақпарат агенттігі Haqqin.az сайтына сілтеме жасап.
Армения премьер-министрі Никол Пашинян Тбилисиде өткен V “Жібек жолы” форумында сөйлеген сөзінде Тоқаевқа алғыс білдірді.
“Кеше Ильхам Әлиев Әзербайжан өз аумағы арқылы Армения бағытындағы жүк транзитіне қойылған шектеулерді алып тастайтынын мәлімдеді. Бұл – аса маңызды шешім. Осы қадамы үшін Әзербайжан президентіне ризашылығымды білдіргім келеді. Сондай-ақ осы келісімге қол жеткізудегі рөлі үшін Қазақстан президентіне және Грузия премьер-министріне де алғыс айтамын”, – деді Никол Пашинян.
Арменияға жүк транзитіне қойылған барлық шектеулердің алынғанын Ильхам Әлиев бұған дейін Астанада Қазақстан президенті Қасым-Жомарт Тоқаевпен келіссөздерден кейін журналистерге арналған брифингте хабарлаған болатын. Ол алғашқы транзиттік жүктің Қазақстаннан жөнелтілетін астық болатынын айтқан.
“Менің ойымша, бұл Әзербайжан мен Армения арасындағы бейбітшіліктің тек қағаз жүзінде емес, іс жүзінде де орнағанының жақсы көрінісі”, – деді Ильхам Әлиев.
Әзербайжан президентінің астаналық мәлімдемесінен кейін Армения экономика министрі Геворг Папоян Facebook парақшасында Қазақстан астығының алғашқы партиясының жеткізілетінін растады.
“Жақын уақытта Ақтау – Баку бағыты бойынша, әрі қарай Әзербайжан мен Грузия теміржолдары арқылы Арменияға Қазақстан астығының алғашқы партиясы жеткізіледі. Бейбітшілік орнады”, – деп жазды Папоян.
Фото: Reuters
