Батыс Қазақстан облысында шенеунік кәмелетке толмаған қызды зорлады деген күдікке ілінді. Күдіктінің босатылуына қатысты полиция түсініктеме берді, деп хабарлайды +7.kz ақпарат агенттігі.
Бұған дейін жәбірленушінің әкесі 68 жастағы ер адамның оның кәмелетке толмаған қызын алдап өз үйіне алып барып, оған қатысты күш қолданғанын мәлімдеген. Әкесінің айтуынша, арыз жазылғаннан кейін күдікті ұсталған, алайда көп ұзамай босатылған. Сондай-ақ ол тергеу жұмыстары тиісті деңгейде жүргізілмей жатқанын айтқан.
Осыған байланысты полиция Қылмыстық кодекстің “Кәмелетке толмаған адамды зорлау” бойынша қылмыстық іс қозғалғанын хабарлаған.
БҚО Полиция департаментінің мәліметінше, 2 қаңтар күні полицияға Ақсай қаласының 16 жастағы тұрғынына қатысты заңға қайшы әрекеттер жасалғаны туралы хабарлама түскен. Аталған дерек бойынша қылмыстық іс тіркелген.
“Тергеу барысында объективті зерттеу үшін маңызы бар хат алмасу және өзге де мән-жайлар анықталды. Тергеу нәтижесінде кәмелетке толмаған қызға қатысты күш қолдану фактісі расталған жоқ. Мұны жәбірленушінің өзі және анасы да растады. Олар күдіктіге қатысты ешқандай талап-арыздары жоқ екенін, қарым-қатынастың өзара келісім негізінде болғанын айтты”, – деп мәлімдеді полиция.
БҚО полиция департаментінің дерегінше, күдікті аудандық әкімдік бөлімінің қызметкері болған. Арыз түскеннен кейін ол қызметінен босатылған. Тергеу жалғасуда. Іс облыстық полиция департаменті басшылығының бақылауында.
Фото: depositphotos.com
