Президент әкімшілігі басшысының орынбасары Ерболат Досаев “Самұрық-Қазына” АҚ директорлар кеңесінің мүшесі болып тағайындалды, деп хабарлайды +7.kz ақпарат агенттігі.
Аталған шешім Үкіметтің 20 желтоқсандағы қаулысымен қабылданғаны атап өтілді. Қордың мәліметінше, қазіргі таңда директорлар кеңесінің құрамында сегіз мүше бар, олардың төртеуі – тәуелсіз директорлар. Директорлар кеңесінің төрағасы – премьер-министр Олжас Бектенов.
“Самұрық-Қазына” қоры мұндай құрылым корпоративтік басқарудың озық тәжірибелеріне сай келетінін және стратегиялық шешімдерді теңгерімді қабылдауға мүмкіндік беретінін атап өтті.
Еске салайық, биыл 24 мамырда мемлекет басшысының жарлығымен Ерболат Досаев 2022 жылғы қаңтардан бері атқарған Алматы қаласының әкімі қызметінен босатылған болатын.
Ал қыркүйек айында мемлекет басшысының тағы бір жарлығымен Ерболат Досаев президент әкімшілігі басшысының орынбасары қызметіне тағайындалды.
Фото: Алматы қаласы әкімдігінің баспасөз қызметі
