Хасан Қасымбаевқа қатысты іс сотқа жіберілгені белгілі болды, деп хабарлайды +7.kz.
Бұл туралы Алматы облысының прокуратурасы мәлімдеді.
“Алматы облысы полиция департаментінің тергеу басқармасы Хасан Қасымбаев және басқа тұлғаларға қатысты қылмыстық іс бойынша тергеп-тексеруді аяқтап, осы жылдың 21 шілдесінде істі айыптау актісімен облыс прокуратурасына жолдаған”, – деп мәлімдеді прокуратураның баспасөз қызметі.
Облыс прокуратурасы 29 шілдеде іс бойынша құрылған айыптау актісін бекітіп, істі қарау үшін Талғар аудандық сотына жолдағанын хабарлады.
Алматы облыстық полиция департаментінің мәліметіне сәйкес, Қасымбаевқа қатысты адам ұрлау, денсаулыққа қасақана ауыр зиян келтіру және бопсалау фактілері бойынша тергеу амалдары жүргізілді.
Еске салайық, былтыр қараша айында Хасан Қасымбаев қамауға алынды. Оның 16 жастағы Шерзат Полаттың өлімінен кейін талғарлықтар оны “Хуторские” тобының басшысы болуы мүмкін екенін айтылған еді. Кейін Ішкі істер министрінің бірінші орынбасары Бауыржан Әленов кәсіпкер Хасан Қасымбаевқа қатысты түсінік беріп, “Хуторовский” ұйымдасқан қылмыстық тобы тіркелмегенін мәлімдеді.
Еске салсақ, осыған дейін Шерзат Полаттың ағасының өліміне қатысты тергеу тоқтатылғаны белгілі болған.
Фото: Видеодан скрин
