Илон Маск Optimus роботтарынан тұратын әскер құруды жоспарлап отыр, деп хабарлайды +7.kz ақпарат агенттігі ТАСС агенттігіне сілтеме жасап.
Маск жақын уақытта адам тектес роботтардан құралған әскер жасақтамақ.
“Біз Optimus роботтарының бір миллион данасын өндіретін өндіріс желісін құрамыз. Өндіріс келесі жылдың соңына қарай басталады деп үміттенемін”, — деді Маск Tesla компаниясының басшылығымен өткен конференцияда.
Оның айтуынша, үшінші буындағы Optimus роботтарының жаңа нұсқасының прототипі 2026 жылдың бірінші тоқсанында, мүмкін ақпан немесе наурыз айында дайын болады. Алайда жылына 1 миллион робот шығару қуатына жету үшін біраз уақыт қажет.
Масктың айтуынша, басты қиындық — дайын өндірістік тізбектің жоқтығында. Сондықтан Tesla компаниясы бөлшектердің басым бөлігін өз күшімен өндіретін болады.
Ол алдағы уақытта Optimus 4 моделі 10 миллион дана, ал Optimus 5 моделі 50–100 миллион дана көлемінде шығарылатынын мәлімдеді. Масктың пікірінше, роботтар мен автопилотты көліктер бірге жұмыс істейді.
Еске салайық, 2022 жылдың желтоқсанында Tesla компаниясы алғашқы адам тектес Optimus роботын таныстырған еді. Илон Маск Optimus роботтарының 2025 жылдың соңына дейін сатылымға шығатынын және олардың көптеген мамандықтарда адамдарды алмастыра алатынын айтқан болатын.
Фото: Видеодан скрин
