Балқаш қаласында “Қазақмыс” компаниясының қызметкері 8 жасар баланы қатыгездікпен ұрып-соққты деген күдікке ілінді, деп хабарлайды +7.kz.
Баланың анасы Мадина Досымбекова әлеуметтік желіде жазба жариялап, көпшіліктен қолдау сұрады.
“8 жасар ұлым қатігездікпен қорлық көрді. Баламның саусақтары сындырылып, басынан соққы алған, денесі күйік шалған. Осындай жан түршігерлік әрекетті Балқаштағы “Қазақмыс” корпорациясының қызметкері Алмас Басымбеков жасады. Оның жұбайы Нәсипгүл Айдынова да аталған компанияда жұмыс істейді. Қазіргі таңда бұл істі жауып тастауға тырысып жатыр. Күдіктінің туыстары мен таныстары құқық қорғау органдарында, ауруханалар мен мемлекеттік ұйымдарда еңбек етеді. Тергеуге қысым жасалып жатыр”, – деп жазды Досымбекова.
Сонымен қатар әйел жұртшылықтан қаржылай көмек сұраған.
“Қазіргі уақытта 512 000 теңге жиналды. Мен басқа қаладамын. Мұнда менің ешбір туысым да, досым да жоқ. Ұлыммен жалғызбын. Оның жағдайы өте ауыр. Бір қолы гипспен, екінші қолы таңылған, жүйелі түрде система қабылдап жатыр. Мен оны бір сәтке де жалғыз қалдыра алмаймын”, – дейді әйел.
Оқиғаға қатысты Қарағанды облыстық полиция департаменті ресми түсініктеме берді.
“Іс шеңберінде тергеу жалғасып жатыр. Тергеу және жедел-іздестіру іс-шаралары жоспарға сәйкес атқарылуда. Сонымен қатар, бірнеше сот-медициналық сараптама тағайындалды”, – делінген Қарағанды облысы ПД баспасөз қызметінің мәлімдемесінде.
“Қазақмыс” корпорациясы жас баланың жарақат алғаны туралы ақпаратқа алаңдаушылық білдіріп, жағдайды бақылауда ұстап отырғанын мәлімдеді.
“Қызметкерге қатысты қандай да бір шешім тек ресми тергеу аяқталып, оның әрекетіне заң тұрғысынан баға берілген соң қабылданады”, – делінген компанияның хабарламасында.
Фото: Әлеуметтік желіден
