Қазақстанда мұнай өңдеу зауыттары АИ-100 маркалы бензин өндіруді бастауды жоспарлап отыр, деп хабарлайды +7.kz.
Бұл туралы энергетика министрлігі мәлімдеді.
Ведомство мәліметінше, кейбір елдерде “премиум” санатына жататын АИ-100 маркалы бензин сатылатын станциялардың саны артып келеді. Бұл – сұраныстың өсіп келе жатқанын көрсетеді. Қазақстандағы мұнай өңдеу зауыттары да осы отынды өндіруді бастауға дайындалып жатыр.
“Қазіргі уақытта Қазақстанда АИ-100 маркалы бензин өндірілмейді. Дегенмен, отандық мұнай өңдеу зауыттарында бұл бензин түрін өндіруді іске қосу бойынша тиісті жұмыстар жүргізіліп жатыр”, – делінген хабарламада.
Техникалық-экономикалық негіздеме дайындалғаннан кейін елде нарықтағы сұранысқа сәйкес автокөлік бензинінің маркаларының тізімі анықталады.
АИ-100 маркалы бензин негізінен спорттық көліктер мен суперкарларға қолданылады. Сондай-ақ бұл отын жоғары жылдамдыққа жетуге арналған қуатты қозғалтқыштары бар автомобильдерге де сай келеді.
Фото: depositphotos.com
