Қазақстанда бір палаталы Парламент пайда болуы мүмкін. Бұл туралы мемлекет басшысы Қазақстан халқына Жолдауында айтты, деп хабарлайды +7.kz.
“Мен Сенатқа он жыл басшылық еттім. Бұл жұмысты қашанда зор мәртебе әрі үлкен жауапкершілік деп санадым. Сондықтан маған осы мінберден парламенттік реформа туралы айту оңай емес. Соған қарамастан мен дәл бүгін елімізде көп ұзамай бір палаталы Парламент құру туралы бастама көтергім келеді”, – деп мәлімдеді Тоқаев.
Тоқаев бұл өте маңызды мәселе екенін алға тартты.
“Оны асығыс жүзеге асыруға болмайды. Бұл реформа азаматтық секторда, сарапшылар ортасында, сондай-ақ, әрине, қазіргі Парламентте жан-жақты талқылануы қажет. Реформаның мән-маңызы айрықша екенін ескерсек, оны талқылауға бір жыл уақыт керек деп ойлаймын”, – деді президент.
Ол 2027 жылы жалпыұлттық референдум өткізіп, конституцияға тиісті өзгеріс енгізуге болатынын айтты.
“Мен мемлекеттің тағдырын айқындайтын барлық мәселе халықтың келісімімен ғана шешіледі деп бұған дейін бірнеше рет айттым. Егер бір палаталы Парламент құру қажет деген ортақ шешімге келсек, ондай Парламентті тек қана партиялық тізім бойынша сайлаған жөн деп санаймын”, – деді мемлекет басшысы.
Фото: Gov.kz
