2025 жылғы 11 тамыздан бастап Қазақстанда электрондық цифрлық қолтаңба (ЭЦҚ) алудың тәртібі жеңілдетіледі, деп хабарлайды +7.kz.
Цифрлық даму министрлігінің баспасөз қызметінің мәліметінше, ЭЦҚ алу қызметі толықтай онлайн форматқа ауыстырылады. Бұл азаматтардың жеке деректерін қорғау деңгейін арттыру және цифрлық тұлғаның сақталуын қамтамасыз ету мақсатында жүзеге асырылуда. Енді бөгде адамдар басқа біреудің ЭЦҚ-сын ала алмайды.
Бұған дейін ЭЦҚ кілтін онлайн және халыққа қызмет көрсету орталығына (ХҚКО) жүгіну арқылы алуға болатын. Енді бұл процедура толықтай онлайн жүргізіледі.
ЭЦҚ-ны онлайн алу жолы:
- egov.kz немесе pki.gov.kz порталына кіріңіз.
- Онлайн өтінім беріңіз.
- Биометриялық сәйкестендіруден өтіңіз – жүйе сіздің бейнеңізді камера арқылы таниды.
- Жеке басыңыз сәтті расталған жағдайда, ЭЦҚ кілті ХҚКО қызметкерлерінің қатысуынсыз бірден онлайн түрде беріледі.
Егер жүйе сәйкестендіруді жүргізе алмаса (мысалы, базада сурет болмауы немесе техникалық ақау жағдайында), қолданушыға әрекетті қайта жасау мүмкіндігі беріледі. Жүйе биометриялық тексеруді 5 ретке дейін қайталауға рұқсат береді. Тек осы 5 сәтсіз әрекеттен кейін ғана ХҚКО арқылы өтінім беріп, қажетті құжаттармен оператор арқылы сәйкестендіруден өту мүмкіндігі ашылады.
Интернетке немесе компьютерге қолжетімділігі жоқ азаматтар ХҚКО-дағы өзіне-өзі қызмет көрсету аймақтарында биометриядан өте алады. Егер қолданушы сәйкестендіруден сәтті өтсе, ЭЦҚ кілттері ХҚКО операторының қатысуынсыз онлайн беріледі.
