Ауыл шаруашылығы министрі Айдарбек Сапаров елімізде ет бағасы қанша теңге болуы керегін айтты, деп хабарлайды +7.kz ақпарат агенттігі.
Министр ет бағасы оның сапасына қарай өзгеретінін алға тартты.
“Фермерлер мал шаруашылығын жылдам әрі жоғары қарқынмен дамытуды жоспарлайды. Әрине, олар бағаның жоғары болғанын қалайды, яғни экспорттық баға 10-12 мың теңге аралығында болу керегін айтып жүр. Қазіргі уақытта экспорттық баға еттің санатына байланысты 4,5 мыңнан 6 мың теңгеге дейін жетеді. Еттің қоңдылығына, сапасына қарай баға өзгеріп отырады”, — деп жауап берді министр Үкіметтегі брифингте.
Оның айтуынша, қазір ішкі нарықтағы тірі малдың еті келісіне 1600-1800 теңге болып отыр.
“Тіпті арзандады деуге болады, бір кезде бұл баға 2000 теңгеге дейін жеткен болса, қазір орта есеппен 1700 теңгеге айналады. Егер 1700 теңгені етке шаққанда есептесек, ішкі нарықтағы көтерме баға шамамен 3000-4000 теңге болады”, — деді министр.
Еске салсақ, Осыған дейін премьер-министр Олжас Бектенов негізгі азық-түлік тауарларына негізсіз бағаның көтерілуін қатаң түрде тоқтатуды және бағаны бақылауда ұстауды тапсырған еді.
Фото: depositphotos.com
