Қазақстанда табыс декларациясын тапсыру тәртібі өзгереді, деп хабарлайды +7.kz ақпарат агенттігі.
Бұл туралы қаржы министрінің орынбасары Ержан Біржанов Үкімет отырысынан кейін өткен баспасөз мәслихатында мәлімдеді.
“Жаңа Салық кодексінде декларацияны алдын ала автоматты түрде толтыру элементі қарастырылған. Келесі жылдан бастап шағын бизнеске осындай мүмкіндік ұсынамыз. Әрі қарай осы функцияның аясын кеңейте береміз. Ал ірі бизнеспен «көлденең мониторинг» жобасын қолға алғанбыз. Ірі бизнес бізге ішкі есептерінің бәрін, құжаттарын тапсырады. Сол арқылы бүкіл деңгейдегі операциялардың мазмұнын түгел көре аламыз. Осының арқасында декларация тапсырудың қажеті де болмай қалады”, – деді Біржанов.
Оған қоса салық төлеушілерге қолдау көрсететін тетіктер қарастырылып жатқанын айтты.
“Қазір бизнеспен жобаны салық төлеушілердің басқа санаттарына да қолдану бағытында жұмыс істеп жатырмыз. Егер бәрі цифрлық форматта болса, онлайн құжат алмасуды жолға қоя алсақ, декларация тапсырудың қажеті өздігінен жойылады”, – деді Ержан Біржанов.
Сондай-ақ, ол алдын ала толтырылған декларацияны салық төлеушіге мемлекеттік кірістер қызметінің өзі ұсынатынын айтады.
“Біз басқа мемлекеттік органдардан, ұйымдардан деректер жинап, салық төлеушінің өзіне көрсетеміз. Бұл бір қызметтің түрі деуге де болады. Салық төлеуші осы алдын ала толтырылған декларацияның растығымен келісе де алады, түзете де алады. Бұл жерде біз салық төлеушінің рөлін өзімізге толық аламыз, кейін ол декларация өзгертілмейді деген сөз емес. Салық төлеуші “жоқ, мына көрсетілгенді табыс деп есептемеймін” деп те айта алады. Осылай түзету енгізе алады”, – деді вице-министр.
Фото: depositphotos.com
