Қазақстандықтар депрессия диагнозы қойылған жағдайда еңбекке жарамсыздық парағын аштыра алады, деп хабарлайды +7.kz ақпарат агенттігі Tengrinews.kz басылымына сілтеме жасап.
Бұл туралы денсаулық сақтау министрлігінің баспасөз қызметі түсіндірді. Ведомство диагнозды тек психиатр дәрігер қоятынын еске салды.
“Депрессияның бастапқы белгілерін тәжірибе дәрігері немесе психолог анықтай алады, бірақ соңғы диагнозды қою, ем тағайындау және науқасты бақылау психиатрдың құзыретінде”, – деп хабарлады министрлік.
Депрессия кезінде шынында да еңбекке жарамсыздық парағын ашуға болады. Алайда кейбір ерекшеліктер бар.
“Егер дәрігер пациенттің жағдайы уақытша еңбекке жарамсыз деп есептесе, жеңіл дәрежедегі депрессия кезінде уақытша еңбекке жарамсыздық парағы ашылады”, – деді министрлік өкілдері.
Ал орта және ауыр дәрежедегі депрессия кезінде денсаулық сақтау министрлігінің стандарттарына сәйкес стационарда емделу ұсынылады.
Фото: depositphotos.com
