Түркістан облысында әкесін ұрып өлтірді деген күдікке ілінген ер адамға қатысты сот отырысы өтіп жатыр. Сот отырысында айыпталушы соңғы сөзін айтты, деп хабарлайды +7.kz ақпарат агенттігі.
Сот барысында айыпталушы эмоциясын ұстай алмай, жылап жіберді. Ол өзінің кінәсін толық мойындап, қоғамнан кешірім сұрады.
“Барлығынан кешірім сұраймын. Барлық қазақ халқынан. Мен өз ісіме шын жүректен өкінемін. Туысқандарымнан кешірім сұраймын. Ашуға берілдім. Өмір бойы өкінетін боламын. Қателестім. Барлық мұсылман халқынан кешірім сұраймын. Мені түсініп, кешірулеріңізді сұраймын. Кінәмді толық мойындаймын”, – деді сотта ер адам.
Бұған дейін прокурор айыпталушыға 6 жыл 2 айға бас бостандығынан айыру жазасын сұраған.
Еске салсақ, әлеуметтік желілерде баласының әкесін ұрып-соққан видеосы тараған еді. Видеоны отбасының көршісі түсіріп алған.
Кейін белгілі болғандай, қарт адам көз жұмған. Полиция ерлі-зайыптыларға қатысты қылмыстық іс қозғады.
