Кишинев қаласының соты Гагаузия автономиясының басшысы Евгения Гуцулды заңсыз қаржыландыру ісі бойынша 7 жылға бас бостандығынан айыруға үкім шығарды, деп хабарлайды +7.kz.
Тергеу дерегінше, Гуцул 2019–2022 жылдары «Шор» партиясының хатшысы болып тұрған кезінде Ресейден Молдоваға заңсыз ақша жеткізумен айналысқан. Ол партия кеңселерінің жұмысын үйлестіріп, ұйымдасқан қылмыстық топтан 42,5 миллион лей (шамамен 2,4 миллион доллар) көлемінде қаржы алған деген айып тағылған.
Соттағы соңғы сөзінде Евгения Гуцул өзіне тағылған айыптарды мойындамай, ақтауын сұрады.
“Мен Молдоваға бір лей де алып келген жоқпын. Менің екі балам бар – бірі 16-да, екіншісі небәрі 3 жаста”, – деді ол.
Адвокатының айтуынша, Молдова заңдарына сәйкес, аналар жазасын балалары 8 жасқа толғаннан кейін өтеуге құқылы.
Сот үкіміне сәйкес, Евгения Гуцул заңсыз қаржы ретінде танылған 40 миллион лейді қайтаруы тиіс.
Сондай-ақ осы іс бойынша партияның тағы бір хатшысы Светлана Попан 6 жылға бас бостандығынан айырылды.
Фото: РИА Новости
