Әлеуметтік желілерде Алматыда Orda порталының кеңсесінде және бас редакторы Гүлнара Бажкенованың пәтерінде тінту жүргізіліп жатқаны туралы ақпарат тарады. Қалалық полицияның баспасөз қызметі жағдайға түсінік берді, деп хабарлайды +7.kz ақпарат агенттігі.
Желіде тараған ақпаратта жаңалық порталының бас редакторына әдейі жалған ақпарат таратты деген бірнеше арыз түскені айтылған.
Алматы полициясының баспасөз қызметі ақпаратты растады.
«Түскен арыздар негізінде ресурстың бас редакторына бірнеше рет әдейі жалған ақпарат таратқаны үшін қылмыстық іс қозғалды. Тергеу әрекеттері аясында арызданушылардың дәлелдері мұқият тексерілуде», — деді полиция департаментінің баспасөз қызметі.
Полицияның мәліметінше, алдын ала тексеру бойынша 2024 жылы жарияланған материалдардың бірінде құқық қорғау органы қызметкерінің пара алу кезінде ұсталғаны туралы әдейі жалған ақпарат таратылған.
«Бұл оқиғаның орын алмағаны нақты анықталды. Осылайша, Бажкенованың әрекеті қызметкердің кәсіби қызметі туралы жалған түсінік қалыптастырды және оның кәсіби беделіне зиян келтірді», — деп хабарлады полиция.
Департамент мәліметіне сәйкес, басқа жарияланымдардың бірінде мүліктік дауға қатысты залал көлемі мен себептері туралы бұрмаланған және дұрыс емес ақпарат берілген көрінеді
«Сонымен қатар, өткен жылдардағы басқа жарияланымдарға қатысты зардап шеккендердің арыздары бойынша тергеу жүргізілуде, олар да жалған және қоғамды адастыратын ақпарат болуы мүмкін», — деп түсіндірді полиция.
Полиция бас редактордың тұрғылықты жері мен жұмыс орнында тергеу әрекеттері жүргізіліп жатқанын растады.
«Жарияланған әдейі жалған ақпаратты дайындау және тарату жағдайларын анықтау, сондай-ақ олардың шығу тегін тексеру үшін электрондық құрылғылар мен материалдар алынып жатыр», — деп қорытындылады департамент.
Фото: gulnara.bazhkenova/Facebook
