Жаңа оқу жылы басталғалы бері алаяқтар балаларға қоңырау шалып, өзін мұғаліммін деп таныстырып, оқушыларды алдап жатыр, деп хабарлайды +7.kz.
Бұл туралы оқу-ағарту министрлігі балалардың құқықтарын қорғау комитеті мәлімдеді.
Комитеттің хабарлауынша, “Электрондық күнделікті жаңарту” деген сылтаумен олар SMS арқылы келген бір реттік құпия кодтарды сұрайды. Бала оны ата-анасына немесе мектебіне көмектесіп жатырмын деп ойлауы мүмкін. Іс жүзінде алаяқтар осы кодтарды пайдаланып, “Электрондық үкімет” жүйесіне, онлайн-банкингке немесе туыстарының банк шоттарына қол жеткізеді.
Осы ретте министрлік SMS-тегі кодтардың жеке мәлімет екенін және оларды ата-анадан басқа ешкімге айтуға болмайтынын ескертті.
“Күдікті әрекеттер байқалған жағдайда құқық қорғау органдарына немесе 111 Байланыс орталығына хабарласуға болады. Балаларыңызды қорғаңыздар — олардың қауіпсіздігі сіздің қырағылығыңыздан басталады”, – делінген ҚР Оқу-ағарту министрлігі Балалардың құқықтарын қорғау комитеті таратқан хабарламада.
Фото: Freepik.com
