Қазақстандықтар енді нотариус беретін құжатты электронды форматта ала алады, деп хабарлайды +7.kz.
Бұл туралы әділет министрлігінің ресми өкілі Талғат Уәли мәлімдеді.
Оның айтуынша, бұған дейін нотариустың атқарушылық жазбасы тек қағаз түрінде рәсімделетін. Оны алу үшін азамат нотариусқа барып, құжаттарының түпнұсқаларын ұсынуы және одан кейін сот орындаушысына жүгінуі қажет еді.
“Нотариустың атқарушылық жазбасы – борышты мәжбүрлеп өндіруге арналған құжат. Яғни, қарызды немесе мүлікті қайтару мақсатында нотариус арнайы атқарушылық жазба жасайды. Мысалы, егер қарыз немесе жалға алу келісімшарты нотариалды расталған болса не болмаса нотариалды атқарушылық жазбаны көздейтін шарт болса, онда борышкерден өндіріп алу үшін сотқа жүгінбей-ақ, бірден сот орындаушысына баруға болады. Бұл уақытты үнемдеп, өндіріп алу рәсімін жеңілдетеді”, – деп түсіндірді Талғат Уәли.
Енді бұл рәсім жеңілдетілді. Атқарушылық жазба электронды форматта, нотариустың электронды цифрлық қолтаңбасы арқылы рәсімделеді. Мұндай құжат қағаз түріндегімен бірдей заңдық күшке ие.
Сондай-ақ арнайы жеке кабинет жасақталған. Сол арқылы борышкерге хабарлама жолданып, ол өз қарсылығын білдіре алады. Егер қарсылығына негіз болса, нотариус атқарушылық жазбаны жоюы тиіс.
Фото: Gov.kz
