Фото: Жоғарғы сот
Шерзатат Полаттың өліміне қатысты сот отырысында мемлекеттік айыптаушы Дана Сәрсенбай айыптау тарапынан сотталушыларға қандай жаза сұралатынын жария етті, деп хабарлайды +7.kz.
“Құрметті төрағалық етуші сот, мемлекеттік айыптың келесі бағытын сұраймын. Ысқақ Думан Қайдарұлы кәмелет жасқа толмаған, 1 жыл 6 айға бас бостандығынан айыру жазасын тағайындауды, Әскентай, Балғожаев, Тоқтаубаев, Қалиахметтің әр қайсысына 7 жылға бас бостандығынан айыру жазасын тағайындауды сұраймын. Ілиясовқа 9 жылға, Тоқтаубаевқа 15 жылға, Сакиевке 20 жылға, Шынасыл Абзал Нұрғалиұлына 23 жылға бас бостандығынан айыру жазасын тағайындауды сұраймын”, – деді Дана Сәрсенбай.
Мемлекеттік айыптаушының сөзінен кейін пікірталас барысында сөз жәбірленуші тараптың өкілдеріне берілді.
Осыған дейін прокурор Дана Сәрсембай айыптау қорытындысын жариялау барысында Шерзат Полаттың қалай өлтірілгенін баяндаған еді. Тергеу мәліметіне сәйкес, Шерзатқа пышақ жарақатын салғаннан кейін оны шабуыл жасағандар тобы аяусыз соққыға жыққан.
Тергеу нұсқасы бойынша, Шерзат Полатты өлтірді деген басты күдікті – Абзал Шынасыл. Мемлекеттік айыптаушының айтуынша, Абзал Шынасыл Шерзатқа пышақпен өлімге әкеп соқтырған соққы жасаған.
Айыпталушы Шынасыл Абзал ҚР Қылмыстық кодексінің “Адам өлтіру” бабы бойынша айыпталуда. Сонымен қатар оған “Бұзақылық” бойынша да айып тағылып отыр.
Айыпталушы Сакиев Равиль ҚР ҚК 293-бабының 3-бөлігі “Бұзақылық” және 99-бабының 2-бөлігі, 24-бабының 3-бөлігі “Адам өлтіруге оқталу” бойынша айыпталуда.
Белгожаев Шыңғыс, Дархан Аскентай, Нұрқияс Ильясов, Тоқтаубаев Нұрбол, Тоқтаубаев Азамат, Қалиахмет Дидар ҚР ҚК 293-бабы “Бұзақылық” бойынша айыпталуда.
Кәмелетке толмаған Ы.Д.-ға қатысты “Ауыр қылмыс туралы хабарламау” бабымен айып тағылған.
