Мемлекет басшысы “Достық — Мойынты” теміржолының екінші желісін іске қосты, деп хабарлайды +7.kz ақпарат агенттігі.
Өз сөзінде Қасым-Жомарт Тоқаев қатысушыларды “New Silk Way” VII халықаралық көлік-логистика бизнес-форумының басталуымен құттықтап, іске қосылудың ерекше маңыздылығын атап өтті.
“Бәріміз “Достық — Мойынты” теміржолының екінші желісінің ресми ашылуына куә болып отырмыз. “Достық — Мойынты” жолы шын мәнінде аса маңызды инфрақұрылым жобасы. Бұл жоба Қазақстанның көлік-логистика жүйесінің дамуына, оның тиімділігін нығайтуға айрықша серпін беретіні сөзсіз. Ал тарихымызға үңілсек, осыдан отыз бес жыл бұрын “Достық — Алашаңқай” жобасы іске қосылды. Қазақстан мен Қытайдың теміржолы тоғысты. Бұл еліміз үшін тарихи оқиға болды”, – деді Тоқаев.
Ол бүгінгі рәсімге осы жолдың құрылысына қатысқан ардагерлер шақырылғанын атап өтіп, оларға шын жүректен алғысын білдірді.
“Мен халыққа Жолдауымда, көлік-логистика саласы – экономиканың қозғаушы күші, халықаралық байланысты нығайтатын негізгі фактордың бірі деп атап өттім. Қазақстанның бұл саладағы әлеуеті зор. Ұлы Жібек жолы Қазақстан мен Орталық Азия арқылы өткен. Қазақ жері ежелден Қытай мен Еуропа арасындағы алтын көпір саналады. Қытай – біздің мәңгі, тату көршіміз әрі сенімді одақтасымыз. Біз бір-бірімізге әрдайым қолдау көрсетеміз. Қос халықтың қарым-қатынасы мызғымас достыққа, өзара сенімге негізделген. Елдеріміздің болашаққа деген көзқарасы — ортақ. Көп саладағы ынтымақтастығымыз нығаюда. Әсіресе, “Бір белдеу, бір жол” жаһандық жобасының мән-мағынасы айрықша. Баршаңызға мәлім, 2013 жылы Төраға Си Цзиньпин бұл бастаманы Қазақстанда жариялады. Біз осы жобаны барынша қолдаймыз, оны жүзеге асыруға белсене атсалысып жатырмыз. Себебі бұл бастама еліміздің мүддесіне толық сай келеді. “Достық — Мойынты” теміржолының екінші желісі — соның айқын дәлелі”, – деді Тоқаев.
Фото: Ақорда
